ʼn Boer van Limpopo is die afgelope naweek deur onbekende verdagtes in die rug geskiet toe hy reageer het op ʼn alarm by ʼn stoorkamer op ʼn plaas naby Ohrigstad in Limpopo.

Marnus van der Wal van Ohrigstad-boerevereniging se veiligheidskomitee het aan Maroela Media vertel Dewald Els (38) is Saterdag tussen 02:00 en 03:00 aangeval.

“Die store en die huis is ʼn hele ent uitmekaar. Een van die alarms het in die stoor afgegaan, en hy het op sy vierwielmotorfiets gaan ondersoek instel,” het Van der Wal gesê.

Hy verduidelik verder dat hulle vermoed die alarm het moontlik afgegaan weens ʼn uil. “Toe hy die alarm stilgemaak het en weer terug op pad huis toe was, het ʼn verdagte op hom losgebrand en hom in die rug geskiet,” het Van der Wal gesê.

Loading...

Els kon gelukkig daarin slaag om huis toe te ry en daar is van die huis af alarm gemaak. “Ons het met ʼn opvolgoperasie begin, maar dit was ongelukkig onsuksesvol.”

Els is na die Mediclinic Nelspruit gehaas. “Die koeël is by sy rug in en weer uit, gelukkig is daar nie organe raakgeskiet nie. Ons het vanoggend met sy vrou gepraat en sy het bevestig dat hy steeds in die hospitaal is. Hy het baie pyn, maar loop al ʼn bietjie rond,” het Van der Wal gesê.

Van Der Wal vertel dat daar twee dooie, vergiftigde hoenders op die toneel aangetref is. “Ons vermoed hulle was op pad na die huis waar sy vrou en kinders geslaap het en die nabygeleë huis waarin sy ouers woon. Ons dink hulle het verbouereerd geraak toe Dewald na die stoor se kant toe ry; hulle het dalk gedink hy weet van hulle en het toe geskiet.”

Els en sy pa boer saam op die plaas met koring en groente. Sy ouers was nie dié spesifieke aand tuis nie.

Lt.kol. Moatshe Ngoepe, woordvoerder van die polisie, het aan Maroela Media bevestig ʼn saak van poging tot moord word ondersoek.

“Die polisie het ʼn reusesoektog van stapel gestuur na die verdagtes wat ná die skietery van die toneel gevlug het. Die motief vir die skietery is nog onbekend,” het Ngoepe gesê.

Volgens Ngoepe het die voorval op die plaas Jan Else plaasgevind.